Rəsmi rəqəmlər gəldi: GTA VI bir gündə 3,79 milyard dollar qazandı
Rockstar Games GTA VI-nin ilk günü 3,79 milyard dollarlıq satış etdiyini və çıxışdan əvvəl 32,5 milyon nüsxə satıldığını açıqladı. Şirkət bunu əyləncə tarixinin ən böyük startı adlandırır.
Bir neçə gün analitiklərin təxminləri ilə yaşadıqdan sonra GTA VI üçün ilk rəsmi rəqəmlər də açıqlandı. Rockstar Games və onun sahibi Take-Two Interactive 20 noyabrda yaydıqları bəyanatda oyunun ilk günü təxminən 3,79 milyard dollarlıq pərakəndə satış etdiyini bildirdilər. Şirkətin sözlərinə görə, bu, film, musiqi və oyun daxil olmaqla bütün əyləncə sahələrində indiyədək qeydə alınan ən böyük startdır.
Hələ çıxmamış 32,5 milyon
Bəyanatda maraqlı bir detal da var: oyun rəsmi çıxışdan əvvəl, yəni öncədən sifariş və yükləmə dövründə 32,5 milyon nüsxə satılıb. Rockstar bunu bütün platformalar üzrə yeni rekord adlandırır. Rəqəmlər şirkətin öz hesablamalarına əsaslanır və 19 noyabrın sonuna qədər olan dünya satışlarını əhatə edir. Platformalar üzrə bölgü isə açıqlanmayıb.
Xatırladaq ki, bundan əvvəl Sensor Tower şirkəti ilk gün üçün təxminən 24,6 milyon nüsxə və 2,36 milyard dollar gəlir proqnozlaşdırmışdı. Rəsmi rəqəmlər bu təxminləri xeyli üstələdi. Rockstar həmçinin oyunun Metacritic-də 99 bal topladığını və bununla bütün zamanların ən yüksək qiymətləndirilən oyunu olduğunu vurğulayır.
PS5 sahiblərinin çoxu Leonidada idi
Oyunçuların marağını göstərən başqa bir rəqəm də var. Circana analitiki Mat Piscatella-nın paylaşdığı məlumata görə, 19 noyabrda aktiv olan ABŞ PS5 oyunçularının 61 faizi həmin gün GTA VI oynayıb. Xbox-da bu göstərici dünya üzrə 56 faiz olub. PS5-də GTA VI oynayanlar həmin gün orta hesabla 513 dəqiqə, yəni təxminən 8,5 saat oyunda qalıblar.
Rockstar-ın qurucusu Sam Houser bəyanatda oyunçulara təşəkkür edərək GTA VI ilə studiyanın yeni mərhələyə qədəm qoyduğunu deyib. Oyun yalnız PS5 və Xbox Series X|S üçün mövcuddur, PS4-də işləmir.
GTA VI-ni PS5 üçün saytımızın kataloqunda tapa bilərsiniz.
Mənbə: Business Wire (Rockstar Games), Push Square, Push Square (Circana)
